c) Instrucións para cubrir os impresos de solicitude:

- Cada participante só pode cubrir unha solicitude. Nela elixirá, por orde de prioridade, un máximo de cinco quendas ou actividades por solicitude. Cada quenda ou actividade vai identificada cun código.

- Os datos do solicitante deben ser os do mozo ou moza que opta a participar nas actividades. No caso das solicitudes múltiples deberanse cubrir os datos de todos os irmáns que solicitan a súa participación (ata un máximo de catro).

- As solicitudes deberanas asinar os solicitantes e os seus pais/nais ou titores.

- Se o/a solicitante é galego/a non residente en Galicia, na súa solicitude debe figurar, para as comunicacións, un enderezo nesta comunidade autónoma.

- A duplicidade dunha solicitude dará lugar á inadmisión de ambas, polo que o solicitante quedará fóra do concurso.

- Non terán validez, e polo tanto non serán incluídas no sorteo, as solicitudes que se reciban vía fax.

- Todas aquelas persoas que presenten a súa solicitude a través do procedemento do portelo único dos concellos ou por correo ordinario deberán remitir, unha vez rexistrada, unha copia por fax ao número 981 545 843.



d) As solicitudes dirixiranse ao director xeral de Xuventude e Solidariedade, e poderán presentarse no rexistro xeral da Vicepresidencia da Igualdade e do Benestar, nos rexistros das súas delegacións provinciais ou a través de calquera dos medios establecidos no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.



e) O interesado poderá comprobar a recepción da súa solicitude a partir do día 21 de abril no teléfono xove 902 152 535 e na páxina web www.xuventude.net.



f) O prazo para presentar as solicitudes remata o día 11 de abril de 2008.

ADXUDICACIÓN

A adxudicación pode ser:

- Directa, se a demanda non supera o número de prazas dispoñibles.

- Por sorteo informático, no suposto de que o número de solicitudes supere o número de prazas dispoñibles. Neste caso, o sorteo realizarase perante notario o día 5 de maio de 2008, ás 12 horas no salón de actos nº 1, sito na planta baixa das dependencias da Consellería de Presidencia, Administracións Públicas e Xustiza en Santiago de Compostela.

Co sorteo cubriranse as prazas nas distintas actividades e xerarase unha lista de espera para cada unha das actividades. O número de reservas en cada actividade será do 50% das prazas convocadas.

A Dirección Xeral de Xuventude e Solidariedade fará público o resultado do sorteo, incluídas as listas de espera, e confeccionará a correspondente lista de admitidos para cada quenda e actividade.

A comunicación do resultado do sorteo para os participantes seleccionados levarase a cabo vía sms e correo electrónico ao número de teléfono e conta de correo especificados na solicitude. A lista de admitidos será exposta a partir do día 6 de maio de 2008 na Dirección Xeral de Xuventude e Solidariedade, no rexistro xeral da Vicepresidencia da Igualdade e do Benestar, nos rexistros e servizos de Xuventude e Solidariedade das súas delegacións provinciais, no Centro de Información Administrativa e Atención ao Cidadán de Santiago de Compostela, no teléfono xove (902 152 535) e na páxina web www.xuventude.net.

No caso de se produciren baixas, a Dirección Xeral de Xuventude e Solidariedade contactará cos suplentes a partir do 2 de xuño de 2008, seguindo a orde de lista, a través de chamada telefónica.

Realizaranse 3 chamadas, entre as 9 e 15 horas, que quedarán rexistradas para a súa constancia. De non contactarmos co interesado, este será dado de baixa e procederase a chamar ao seguinte na lista de espera.

As prazas vacantes que non se cubrisen polos procedementos de adxudicación establecidos anteriormente serán ofertadas a partir do día 13 e ata o día 24 de xuño. Estas prazas serán expostas na páxina web www.xuventude.net.