QUE SON?
|
 |
O servizo voluntario en campos de traballo son actividades encamiñadas a favorecer e fomentar a convivencia, a participación, a tolerancia e a solidariedade entre a mocidade e o seu contorno, a través da colaboración desinteresada e voluntaria en traballos diversos en beneficio da comunidade. Ofrecen a posibilidade de coñecer novos lugares, outras formas de cultura, de contactar con outros mozos e mozas e de colaborar na realización dun proxecto.
Os campos de traballo desenvólvense en toda a Comunidade Autónoma de Galicia, en outras comunidades autónomas e no estranxeiro. Nun mesmo campo compártense experiencias con mozos e mozas de distinta procedencia, baixo o patrocinio, control ou organización de entidades e organismos oficiais, asociacións xuvenís, culturais, humanitarias, etc.
|
|
TIPOS DE PROXECTOS
Culturais e etnográficos (participación na organización de festas ou eventos culturais, recuperación de tradicións, utensilios antigos...).
Ambientais (recuperación de camiños, espazos naturais...).
Construción e restauración (recuperación de edificios ou lugares para uso público).
Sociais (traballo con nenos, maiores ou persoas con discapacidade).
Arqueolóxicos (recuperación, estudo ou conservación de xacementos).
Recuperación do patrimonio histórico-artístico e cultural (investigación, documentación, recuperación ou/e rehabilitación).
QUE SE LLES OFRECE AOS VOLUNTARIOS E VOLUNTARIAS?
Un proxecto sempre de dimensión social, na procura da mellora ambiental do noso contorno, da convivencia entre as persoas, dun mellor desenvolvemento e integración das persoas con discapacidades, dun maior coñecemento da nosa cultura e a nosa realidade...
Un equipo humano que os acollerá e axudará a levar a cabo o traballo programado e a dinamización do campo.
Os medios materiais necesarios para desenvolveren as tarefas específicas de cada campo.
Un programa con actividades de convivencia, de animación, de ocio e tempo libre.
Aloxamento e manutención durante todos os días que dure a actividade.
Un seguro de accidentes e responsabilidade civil
QUE SE LLES DEMANDA AOS VOLUNTARIOS E VOLUNTARIAS?
Traballar desinteresadamente os días e horas estipuladas no proxecto que se vai desenvolver.
Colaborar e participar no desenvolvemento da programación das actividades de animación.
Contribuír á organización xeral do campo (tarefas de limpeza, cociña, administración, etc.).
Respectar as distintas crenzas, ideoloxías e diferenzas persoais de todos os participantes do campo.
Permanecer no campo durante o período programado.
Respectar as normas de réxime interior e de convivencia propias do campo, que serán, entre outras, as seguintes:
Aceptar as indicacións das persoas responsables da actividade.
Cumprir os horarios en xeral.
Non utilizar vehículos particulares durante o tempo de duración do campo.
Non consumir bebidas alcohólicas.
Non se admitirán persoas alleas ao campo.
|
|
|
